- Particulares e organizacións integradas no Movemento Acampa poden propoñer xa aos seus candidatos
- O prazo remata o 31 de xaneiro e poden presentarse propostas tanto á categoría internacional como local. Neste caso, as candidaturas estarán referidas ao ámbito de actuación de cada Rede Acampa conformada: Galicia (a partir de esta edición Madrid, Brasil e Portugal
A Rede Acampa pola Paz e o Dereito a Refuxio busca de novo a complicidade de todas as organizacións e particulares que a integran para a presentación de candidaturas á segunda edición dos Recoñecementos Internacionais Acampa á Defensa dos Dereitos Humanos na categoría internacional e local. Trátase de elixir entre todos as entidades e persoas merecedoras do aplauso colectivo do Movemento Acampa pola defensa dos Dereitos Humanos, o Dereito a Refuxio e a Defensa da Paz e o Diálogo coma maneira de resolver os conflitos.
O proceso é ben sinxelo. Todas as organizacións que integran, con carta de adhesión, a Rede Acampa Internacional, as persoas que consten rexistradas como asociadas a mesma, e os equipos de coordinación locais de Acampa Internacional poden presentar as súas propostas. É ben doado, só hai que facer chegar dixitalmente, ao correo electrónico acampa@redeacampa.org un breve resumo dos motivos da proposta, con fotografía do candidato/candidata ou logotipo da organización e biografía ou memoria dos mesmos. Está todo, ben detallado no enlace:
https://redeacampa.org/gl/ii-reco-bases-acampa-2022/
O Recoñecemento pretende pór o foco mediático e evidenciar a situación de retroceso dos Dereitos Humanos en todo o mundo e a importancia de recuperalos e defendelos coa forza e resiliencia que demostran os receptores deste Recoñecemento.
O prazo para presentar candidaturas para o Recoñecemento Acampa á Defensa dos Dereitos Humanos 2022 finaliza o 31 de xaneiro de 2022. Podedes postular candidaturas ao Recoñecemento Internacional e tamén ao local en cada cidade ou área na que a Rede Acampa está conformada. No caso concreto de Galicia, e a partir desta segunda edición, amplíase o ámbito do Recoñecemento a organizacións e persoas de todo o territorio galego.
Votacións
Unha vez pechado o prazo de presentación de candidaturas, abrirase un periodo de votación no que poderán participar todas as persoas acreditadas como asociadas a unha das organizacións Acampa e todas as organizacións da Rede Acampa (cun voto por organización). A votación para o Recoñecemento Acampa 2022 será do 15 de febreiro ao 15 de marzo de 2022.
Coma xa ocorreu en setembro co MST brasileiro (Movimento dos Trabalhadores Rurais sem Terra) e o activista coruñés Nicanor Acosta, receptores do I Recoñecemento Acampa á Defensa dos Dereitos Humanos, as organizacións ou persoas elixidas receberán unha Carta de Recoñecemento destacando o labor que se pon en valor e unha peza representativa do Recoñecemento Acampa, obra da escultora Pilar Subías. Tamén o máis sonoro e sincero aplauso colectivo de todo o Movemento Acampa polo seu compromiso exemplar na defensa dos Dereitos Humanos.
Comentarios Recentes