Tamén está confirmada xa a participación do expresidente de Uruguai, Pepe Mujica –que entrará en streaming- e a presenza de Virginia Mielgo, coordinadora do proxecto do Buque de rescate de MSF “Geo Barents”.
Un ano máis o programa de radio Carne Cruda emitirá en directo desde Acampa2023 e o seu director, Javier Gallego Crudo, participará no primeiro dos encontros para falar do odio na información e nas redes.
O grupo musical “Las Antonias” e a banda de percusión inclusiva Diversidarte actuarán durante o encontro
“Odio ou Convivencia” contará tamén cun intenso programa de actos paralelos das distintas organizacións que compoñen o Movemento Acampa.
A Coruña, 26 de abril de 2023.- O equipo responsable de Rede Acampa pecha estes días o programa do que será o VII Encontro Internacional Acampa pola Paz que, baixo o lema “Odio ou convivencia”, converterá de novo os Xardíns de Méndez Núñez e á cidade da Coruña nun espazo referente nacional na defensa dos Dereitos Humanos. Xa confirmaron a súa presenza, entre outros, Baltasar Garzón, presidente da Fundación Internacional que leva o seu nome e traballa na defensa e promoción dos Dereitos Humanos, a loita pola transparencia e o desenvolvemento da Xurisdición Universal. Garzón falará do papel da xustiza como arma para erradicar os discursos de odio. Noutra das mesas estarán Pepe Mujica, expresidente de Uruguai (en streaming) e Virginia Álvarez, máxima responsable de Investigación e Política Interior de Amnistía Internacional e a especialista que nestes momentos pilota a investigación do acontecido o xuño pasado no valo de Melilla onde se produciu un masacre con decenas de mortos e feridos, con comportamentos abusivos por parte das forzas da orde a ambos os dous lados do muro, un espazo no que, naquel día e en moitos outros os Dereitos Humanos son sistematicamente vulnerados.
Virginia Mielgo, a xefa de proxecto do “Geo Barents”, o buque de rescate de Médicos sen Fronteiras, será outra das invitadas ao Acampa2023. Quen mellor que ela para achegarnos á durísima realidade que viven actualmente os buques de rescate no Mediterráneo Central, hostigados e perseguidos por unha Europa que dificulta, cada vez máis, o salvamento de seres humanos nas súas augas e as atormenta impedindo o desembarco destas persoas extenuadas nos seus portos.
Outro dos pratos fortes, xa un clásico nos Encontros Acampa pola Paz, será o programa de radio Carne Cruda, que emitirá de novo en directo desde a carpa central. O seu director, Javier Gallego Crudo, participará ademais nun dos debates falando do que coñece moi ben, os discursos de odio que cada día cóanse na información, nos medios e multiplícanse nas redes sociais.
“Odio ou convivencia” achegarase tamén ao conflito do Sahara Occidental, da man da refuxiado Baba Mohamed Lamín Alí, ou escoitará ao senegalés Senny Kebe falar da Convivencia coas comunidades africanas.
Un campo simulado e unha infinidade de actividades
Acampa montará de novo o tradicional campo simulado, un espazo de reflexión que nesta ocasión reproducirá unha realidade frecuente nos últimos tempos, un campo de refuxiados arrasado polo lume e polo odio, un escenario que vimos, a través dos medios de comunicación, en moitos puntos xeográficos diferentes: os campos de refuxiados de Grecia, de Italia ou de Bangladesh, os campamentos de temporeiros de Huelva ou Almería…
Haberá visitas guiadas tanto ao campo simulado como ás exposicións fotográficas que compoñen a proposta que Rede Acampa fai á cidadanía da Coruña e a súa contorna. Moitas das organizacións que integran o Movemento Acampa programarán ademais actividades propias. A ONG AIRE desenvolverá un xogo de preguntas e respostas sobre Odio, Solidariedade Internacional Galicia outro titulado “Non pases palabra”, Amnistía Internacional entregará no marco do Encontro Acampa os seus premios de microrrelatos da Rede de Escolas de Amnistía e organizará un obradoiro titulado “Da convivencia á violencia escolar”; Mundo sen Guerras e Sen Violencia falará sobre a guerra e o discurso de odio, a desinformación, a censura e a intoxicación respecto ao conflito entre Ucraína e Rusia. Ademais, xa confirmaron a súa presenza en Acampa2023 o grupo musical “Las Antonias” e a banda de percusión inclusiva Diversidarte, que actuarán durante o encontro.
Comentarios Recentes